Ukraynada səfərbərliyin gücləndirilməsi çağırışçıların və bütövlükdə Ukrayna Silahlı Qüvvələrinin əhval-ruhiyyəsinə mənfi təsir göstərir. 

“Cebhe.info” xəbər verir ki, CNN Ukrayna ordusunda yeni qaydaların effektivliyini şübhə altına alıb.

Hərbçilərin sözlərinə görə, onların tabeliyində cəbhəyə getməyə məcbur olan insanlar var və bu, narahatlıq yaradır. Bir hərbçinin bildirdiyinə görə, hərbi təlim və texnika ilə yanaşı, döyüşmək istəyi də vacibdir. O əlavə edib ki, çağırılan şəxslə vətənini müdafiə etməyə gedən biri arasında böyük fərq var. Əsgərlərin könüllü getməli olduğunu vurğulayan hərbçi əlavə edib ki, heç də bütün insanlar döyüşə hazır deyil:

“Bir çoxları xüsusi hazırlıqdan məhrumdurlar və onları peşəkarlara çevirmək mümkün deyil”.

Telekanalın digər həmsöhbəti etiraf edib ki, çağırış məktubu alsa, Ukraynanı tərk edəcək, çünki insanları öldürmək istəmir və prinsipcə buna hazır deyil.
KİV yazır ki, ukraynalılar çox vaxt məlumatsızdırlar: “Onlar döyüş briqadalarında nə baş verdiyini bilmirlər və orduya çağırıldıqdan sonra dərhal cəbhə xəttində tapacaqlarından qorxurlar”. Telekanalın istinad etdiyi hərbçilərin sözlərinə görə, əslində belə deyil. Onların sözlərinə görə, iş üçün bir çox variant var, o cümlədən xüsusi təyinatlılarda pilotsuz təyyarələrlə işləyə bilən çağırışçılar çoxdur.

“Ümumilikdə, davam edən hərbi əməliyyatları nəzərə alsaq, səfərbərlik lazımdır, lakin iki ildir döyüşən insanlar yorulub, bəziləri isə çılğınlaşır”,- deyə telekanalın sitat gətirdiyi kimi Ukrayna hərbçisi etiraf edib.

Xatırladaq ki, Ukraynada ümumi səfərbərlik və hərbi vəziyyət 24 fevral 2022-ci il tarixindən qüvvədədir. Bu ilin may ayında səfərbərlik qaydalarını sərtləşdirən yeni qanun qüvvəyə minib.

Xəzər
“Cebhe.info”