İyulda Rusiyada illik inflyasiya 9,13 %-ə yüksəlib. İyun ayında bu göstərici 8,59 % olub. 

"Cebheinfo.az" xəbər verir ki, Rusiya İqtisadiyyat Nazirliyi bildirib ki, bu artım iyulun 1-də həyata keçirilən mənzil-kommunal xidmətlərin (JKU) tariflərinin indeksasiyası ilə bağlıdır.

Rusiya Federasiyası Dövlət Statistika Federal Xidmətinin məlumatlarına görə, JKU qiymətləri iyulda iyun ayı ilə müqayisədə 8,22 %, keçən ilin eyni ayı ilə müqayisədə isə 9,42 % artıb.

İyulda aylıq inflyasiya 1,14 % təşkil edib. Nazirlik JKU tarifləri nəzərə alınmadıqda aylıq inflyasiyanın 0,5 %-ə qədər azaldığını bildirib.

Ərzaq məhsullarının qiymətlərində artım 0,36 faiz, tərəvəz və meyvələrin qiymətlərində isə 3,73 faiz azalıb. 

O cümlədən, çuğundur 19,1 faiz, kök 6,6 faiz, pomidor 4,5 faiz ucuzlaşıb. Digər ərzaq məhsullarının qiymət artımı isə 0,44 % səviyyəsində qalıb. Bundan əlavə, toyuq yumurtası və toyuq ətinin qiymətləri cüzi ucuzlaşıb.

Digər tərəfdən, qeyri-ərzaq məhsullarının qiymət artımı 0,58 %-ə, xidmət sektorunda isə 2,86 %-ə yüksəlib. Bu artım birbaşa JKU tariflərinin indeksləşdirilməsi ilə bağlıdır.

2022-ci ildə tariflər iki dəfə artırıldığından, keçən il JKU tariflərində artım baş vermədiyi bildirilib.

İyulda ictimai inflyasiya gözləntiləri də artaraq 12,4 %-ə çatıb. Bu göstərici yanvar ayından bəri ən yüksək səviyyə kimi qeydə alınıb. 

Mərkəzi Bank ilin sonuna inflyasiyanın 6,5-7 % diapazonunda olacağını gözlədiyi halda, 2025-ci il üçün inflyasiya gözləntisini 4-4,5 % səviyyəsində yenidən nəzərdən keçirib.

Rusiya Mərkəzi Bankı iyulun 26-da keçirdiyi iclasda uçot dərəcəsini 18 %-ə qaldırıb. Bu artım inflyasiya təzyiqlərinin artması və tələbin təklifi aşması səbəbindən baş verib.

Bank uçot dərəcəsinin ilin sonuna kimi 18-19,4 % diapazonunda qalacağını gözləyir. Növbəti faiz qərarı sentyabrın 13-də açıqlanacaq.

Nigar Hacılı 
"Cebheinfo.az"