Uzun illər "əhali partlayışı" qorxusu ilə yaşayan Hindistan tarixində ilk dəfə ciddi demoqrafik geriləmə ilə üz-üzə qalıb. 

Ölkədə doğum səviyyəsi əhalinin sabit qalması üçün vacib hesab olunan kritik həddən aşağı enib. 

"Cebheinfo.az" xəbər verir ki, rəsmi qurumların açıqladığı son Nümunəvi Qeydiyyat Sistemi (SRS) hesabatına görə, ölkədə bir qadına düşən orta uşaq sayı (ümumi doğum əmsalı) 1,9-a enib. 

Bu göstərici əhalinin uzunmüddətli perspektivdə azalmasının qarşısını almaq üçün tələb olunan 2,1-lik "yenilənmə həddi"nin ilk dəfə altına düşdüyünü göstərir. 2000-ci illərin əvvəllərində bu göstəricinin 3,3 olduğu nəzərə alınarsa, Hindistanda doğum səviyyəsinin azalmasının sürəti hətta mütəxəssisləri də təəccübləndirir. 

Mütəxəssislərin fikrincə, bu sürətli azalmanın arxasında ölkənin son illərdə keçdiyi sosial və iqtisadi dəyişikliklər dayanır. Qadınların təhsil səviyyəsinin yüksəlməsi və doğuma nəzarət vasitələrinə çıxış imkanlarının artması ailələrin uşaq sayı ilə bağlı qərarlarına birbaşa təsir göstərib. 

Bununla yanaşı, həyat xərclərinin yüksəlməsi və uşaq böyütməyin daha bahalı hala gəlməsi ailələri daha az uşaq sahibi olmağa sövq edib. Səhiyyə sahəsində əldə olunan irəliləyişlər nəticəsində körpə ölüm göstəricilərinin son beş ildə hər 1000 canlı doğuma görə 30-dan 24-ə enməsi də mühüm amillərdən biri hesab olunur. 

Bu dəyişiklik ailələrin "uşağımı itirə bilərəm" narahatlığı ilə çoxsaylı övlad sahibi olmaq meyilini əhəmiyyətli dərəcədə azaldıb.

Nigar Hacılı 
"Cebheinfo.az"