Rusiya qoşunları Ukraynanın Kursk bölgəsindəki bütün dayaq məntəqələri boyunca əks-hücumları davam etdirir. 

“Cebheinfo.az” xəbər verir ki, ABŞ-nin Müdafiə Araşdırmaları İnstitutunun yaydığı məlumatda belə deyilir:

“Lakin Rusiya hərbçiləri, çox güman ki, davamlı əks-hücum əməliyyatı apara bilən qüvvələr qrupu yaratmaq üçün hərbi əməliyyat meydanının digər ərazilərindən əlavə birlikləri Kursk bölgəsinə köçürməli olacaq.

Hazırda Rusiya qüvvələrinin Ukrayna ordusunu Kursk bölgəsindən tamamilə çıxarmaq məqsədi ilə genişmiqyaslı koordinasiyalı əks-hücum əməliyyatına başladığını göstərən hərbi əməliyyatları hələ müşahidə edilməyib.

Ukrayna qoşunlarının Kursk vilayətində ələ keçirdiyi əraziləri geri qaytarmaq üçün Rusiyanın əks-hücum əməliyyatı, çox güman ki, Rusiyanın bu ərazisində cəmlədiyindən daha çox canlı qüvvə və maddi vasitə tələb edəcək”.

Adıçəkilən institutun yazdığına görə, Ukraynanın cəbhə xəttindən bu yaxınlarda Kursk bölgəsinə yerləşdirilən Rusiya hava-desant qoşunları hazırda Kursk bölgəsindəki əks-hücumlara görə məsuliyyət daşıyır:

“Bu da Rusiya hərbi komandanlığının ərazini geri almaq üçün daha elitar və ya döyüşə hazır sayılan bölmələrdən istifadə etmək niyyətini göstərir.

Rusiya ordusu çox güman ki, geniş əks-hücum əməliyyatı keçirmək və sonradan beynəlxalq sərhədi gələcək Ukrayna işğalından qorumaq üçün lazım olan döyüşə hazır bölmələr yaratmaq məqsədilə artıq hazırkı hücum əməliyyatlarında iştirak edən bölmələri və ya operativ ehtiyatları Ukraynadan Kursk bölgəsinə köçürməli olacaq”.

Müşfiq Abdulla 
“Cebheinfo.az”