Avropa Kosmik Agentliyi (ESA) və Yaponiya Aerokosmik Tədqiqatlar Agentliyinin (JAXA) birgə layihəsi olan "BepiColombo" kosmik gəmisi Merkuri planetinə indiyə qədər ən yaxın keçidi edib və planetin ən yeni şəkillərini əldə edib.

"Cebheinfo.az" xəbər verir ki, 2018-ci ildə buraxılan "BepiColombo" Merkuri planetinin təxminən 165 kilometrinə yaxınlaşaraq NASA-nın "MESSENGER” vasitəsinin rekordunu qırıb.

"MESSENGER" 2011-ci ildə Merkurinin orbitinə çıxanda o, planetin təxminən 200 kilometrinə yaxınlaşıb.

Sentyabrın 4-də uçuş zamanı "BepiColombo" Merkurinin cənub qütbünün ən aydın görüntülərini əldə edib və planetin səthindəki kraterlərin fotoşəkillərini çəkib. Bu kraterlərə Vivaldi və yeni müəyyən edilmiş Stoddart zərbə kraterləri daxildir. 

Hər iki kraterdə təpə halqası hövzələri kimi tanınan düz zəmində təpələrdən ibarət daxili halqalar müşahidə edilmişdir. Bu strukturlar asteroid və ya kometaların təsirləri nəticəsində əmələ gəlmiş ola bilər.

"BepiColombo" Merkurinin orbitinə daxil olanda yeni kameralarını işlədəcək və beləliklə də rəngli fotoşəkilləri daha yüksək ayırdetmə ilə təmin edəcək.

Onun Merkuri orbitinə 2025-ci ilin sonlarında çıxması planlaşdırılıb, lakin itələyicilərində yaranan problem səbəbindən bu tarix bir il təxirə salınıb.

Dekabr və yanvar aylarında planetin yaxınlığından keçməsi planlaşdırılan "BepiColombo" Günəş ətrafında təxminən iki il dövr edəcək.

Nəhayət, onun 2026-cı ilin noyabrında Merkurinin orbitinə çıxması və planetin sirlərini işıqlandıracağı gözlənilir.

"BepiColombo” tərəfindən təqdim edilən bu yeni məlumatlar Merkurinin quruluşu və tarixi haqqında mühüm məlumatlar verir və planetin kəşfində mühüm addım hesab olunur.

Ləman İsmayıl
"Cebheinfo.az"