Qazaxıstan Prezidenti Qasım-Comərd Tokayev və Çin Prezidenti Si Cinpin 9 May - Qələbə Günü münasibətilə Moskvada qısa, lakin mənalı görüş keçiriblər. 

"Cebheinfo.az" xəbər verir ki, bu görüş Si Cinpinin 17-18 iyun 2025-ci il tarixlərində Astanaya dövlət səfəri öncəsi mühüm diplomatik addım kimi qiymətləndirilir.

Çin lideri Çin-Mərkəzi Asiya dövlət başçıları sammitində də iştirak edəcək. Səfərdə məqsəd Çinin regionda təsirini gücləndirməkdir. 

Qazaxıstan Çinin Mərkəzi Asiyada ən böyük ticarət tərəfdaşıdır. Bu, enerji və nəqliyyat sahələrində irimiqyaslı layihələrlə dəstəklənir. Bunlardan başlıcası Atasu-Alaşankou neft kəməri, Aktobe bölgəsində neft və təbii qaz investisiyaları və Almatıdakı İES-2-nin kömürdən təbii qaza çevrilməsi layihəsidir. 

Çin Mangistaumunayqaz kimi strateji aktivləri və Kaşaqan neft yatağındakı 8,33 % payı kimi əhəmiyyətli enerji investisiyaları ilə də diqqət çəkir. Ən diqqət çəkən hadisələrdən biri Çinin 55 fabrikini Qazaxıstana köçürmək planıdır.

İdeya ilk dəfə keçmiş prezident Nursultan Nazarbayevin dövründə gündəmə gəlib, lakin ekoloji və iqtisadi problemlər səbəbindən ölkədə etirazlara səbəb olub. Tokayev administrasiyası bu plana yenidən baxaraq daha davamlı çərçivədə yenidən gündəmə gətirib.

Çin investisiyaları xüsusilə kənd təsərrüfatı texnologiyaları, suvarma, heyvandarlıq və yem istehsalı kimi sektorlarda təşviq edilir. 

Nigar Hacılı 
"Cebheinfo.az"