ABŞ Prezidenti Donald Tramp tərəfindən martın əvvəlində Çin məhsullarına tətbiq edilən 10 faizdən 20 faizə qaldırılan gömrük rüsumu məhkəməyə verilib. 

"Cebheinfo.az" “The Hill”-ə istinadən xəbər verir ki, iddia Trampın tariflərinə ilk hüquqi etirazdır. 

Floridada yerləşən, Çindən idxal və ixrac edən “Simplified” şirkəti adından açılan məhkəmə iddiasında Trampın əvvəlki həftələrdə məhsullara 20 faizə qədər tarif tətbiqi üçün istifadə etdiyi Beynəlxalq Fövqəladə İqtisadi Güclər Aktının (IEEPA) sərhədlərini aşdığı iddia edilir. İddia Trampın Çinə tətbiq etdiyi tariflərin “qanunsuz” sayılmasını və onların icrasının dayandırılmasını tələb edir. 

Müraciətdə İEEPA-nın iqtisadi sanksiyalar və aktivlərin dondurulması kimi xarici təhdidlərə qarşı tədbirlər görmək üçün qüvvəyə mindiyi və bu qanunun “prezidentlərə daxili iqtisadiyyatda sərbəst hərəkət etmək səlahiyyəti vermədiyi” bildirilib. İEEPA-nın təxminən 50 illik tarixində heç bir prezidentin bu qanundan gömrük rüsumlarının tətbiqi üçün istifadə etmədiyini qeyd edən petisiyada qanunun mətnində gömrük rüsumlarının qeyd olunmadığı və qanunun prezidentlərə vergi tətbiq etmək səlahiyyəti verdiyinə dair hər hansı bir ifadənin olmadığı vurğulanıb. 

Nigar Hacılı 
"Cebheinfo.az"