"Papa John's International" süni intellekt texnologiyasını müştərilərin pizza sifarişi prosesinə daxil etməyi planlaşdırır. 

"Cebheinfo.az" bildirir ki, bu barədə şirkət məlumat yayıb.

Şirkət bu işi "Google Cloud" ilə genişləndirilmiş əməkdaşlıq çərçivəsində görəcək.Şirkətin məqsədi müştərinin əvvəlki sifarişlərinə və davranışına əsaslanaraq telefon bildirişlərini, kampaniyaları, loyallıq  proqramı təkliflərini daha fərdi və uyğun şəkildə təqdim etməkdir.Bundan başqa, yeni onlayn çat-bot istifadəyə veriləcək və sifarişi virtual köməkçilər vasitəsilə vermək imkanı da olacaq.

Bu süni intellektə yönələn son dövrlərin trendinə daha bir nümunədir. Artıq bir çox fastfud şəbəkələri bu texnologiyanı həm satışları artırmaq, həm də müştəri xidmətlərini və daxili prosesləri təkmilləşdirmək üçün istifadə edir.

“Texnologiya o qədər sürətlə inkişaf edir ki, indi artıq bir neçə il əvvəl mümkün olmayanları etmək olur. Bu həm miqyas baxımından, həm təhlükəsizlik baxımından, həm də  xərc baxımından böyük fərq yaradır”, - deyə “Papa John’s”-un rəqəmsal texnologiyalar üzrə direktoru Kevin Vaskoni bildirib.Təqdim olunan bu yeniliklər, əslində, bir çox böyük restoran şəbəkələrinin illərdir istifadə etdiyi satış məlumatlarından faydalanma yanaşmasına bənzəyir.

“Bəzi sahələrdə geri qalmışdıq, amma indi bu fərqi sürətlə bağlayıb, texnologiya sahəsində liderliyimizi yenidən bərpa etmək üçün əlimizdə gözəl fürsət var”, - deyə “Papa John’s”-un baş direktoru Todd Penegor bildirib.

Xatırladaq ki, “Papa John's” 2001-ci ildə ABŞ-də bütün müştərilər üçün onlayn sifariş imkanını təqdim edən ilk milli pizza şəbəkəsi olub.

Todd Penegor bundan əvvəl "Wendy’s" şəbəkəsinin baş direktoru idi və orada da “Google Cloud” ilə birgə süni intellekt layihəsinə rəhbərlik edib.

Kevin Vaskoni isə 2012-ci ilindən 2020-ci ilədək "Domino’s Pizza"da texnoloji dəyişikliklərə rəhbərlik edib.

Səbinə Uğur
"Cebheinfo.az"