Çin ABŞ-nin ölkədən idxal etdiyi məhsullara “qarşılıqlı tariflər” çərçivəsində tətbiq etdiyi gömrük rüsumunu 34 faiz artırmasına cavab olaraq, ixrac qadağaları, məhdudiyyətlər və ABŞ şirkətlərinə qarşı araşdırmalar da daxil olmaqla sanksiyaları açıqlayıb.

"Cebheinfo.az" xəbər verir ki, Çin Ticarət Nazirliyindən verilən açıqlamaya görə, 27 ABŞ şirkəti ixrac nəzarəti və ya qadağa siyahısına əlavə edilib. 

Şirkətlərdən 16-sının hərbi və mülki ikili istifadə üçün məhsullarının ixracı qadağan olunduğu halda, 11 şirkət ixrac qadağası olan “etibarsız qurum” siyahısına salınıb.

Nazirlik Çinin milli təhlükəsizliyini və maraqlarını qorumaq və nüvə silahlarının yayılmaması ilə bağlı beynəlxalq öhdəliklərə əməl etmək məqsədilə 16 ABŞ şirkətinin ixrac nəzarəti siyahısına daxil edildiyini bildirib.

Bu arada, Çinin Bazarın Tənzimlənməsi üzrə Dövlət İdarəsi ABŞ-nin çoxmillətli kimya şirkəti "DuPont"-un Çindəki törəmə şirkəti ilə bağlı antiinhisar qanunlarını pozmaqda şübhəli bilinərək araşdırmaya başlayıb.

Çin Baş Gömrük İdarəsi həmçinin ABŞ-dən olan 6 şirkətin Çinə quş əti məhsulları və sorqo ixracına icazələrini ləğv edib. Çinin bu addımı ABŞ Prezidenti Donald Trampın “qarşılıqlı tariflər” çərçivəsində Çinə 34 faiz əlavə rüsum tətbiq edəcəyini açıqlamasından sonra baş verib.

Vaşinqton administrasiyası 24 faizlik “qarşılıqlı tarif” daxil olmaqla, 10 faizlik baza tarifinə əlavə olaraq Çinə ümumilikdə 34 faiz əlavə gömrük tarifi tətbiq ediləcəyini açıqlamışdı.

Yeni tarif artımları ilə ABŞ-nin Çindən idxal etdiyi məhsullara tətbiq etdiyi minimum tarif 54 faizə yüksəldi.

Pekin administrasiyası həmçinin ABŞ-nin “qarşılıqlı tariflər” çərçivəsində tətbiq etdiyi 34 faizlik tarif artımına cavab olaraq eyni tarifdə əlavə tarif tətbiq edəcəyini açıqlayıb və həmçinin bəzi nadir torpaq elementlərinin ixracına məhdudiyyətlər qoyub.

Nigar
"Cebheinfo.az"