"Prezident İlham Əliyevin qlobal çağırışlara zamanında və çevik reaksiya verərək yürütdüyü siyasət, yalnız Azərbaycanın təhlükəsizlik sisteminin daha etibarlı şəkildə təmin olunmasına deyil, həm də ölkəmizin dünyada mühüm oyunçu rolunda çıxış etməsinə səbəb olub".

Bu sözləri “Cebheinfo.az”-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin sədri, millət vəkili Arzu Nağıyev deyib.

Onun sözlərinə görə, Prezidenti İlham Əliyevin uğurlu diplomatiyası, mürəkkəb və çətin geosiyasi proseslər fonunda Azərbaycanı yeni fürsətlərə yönəldib, milli maraqlarımızın təmin olunmasına və daha güclü, qüdrətli bir dövlətə çevrilməyimizə gətirib çıxarıb:

"Bu siyasətin nəticəsi olaraq, beynəlxalq arenada Azərbaycanın rolu getdikcə artır və ölkəmiz, yeni dünya düzəninin formalaşmasında ciddi oyunçu kimi çıxış etməkdədir. Prezident İlham Əliyevin yürütdüyü çevik və uğurlu siyasət nəticəsində Azərbaycan, dünya enerji və humanitar təhlükəsizlik müstəvisində dialoq mərkəzinə çevrilib. Bakıda keçirilən Cənub Qaz Dəhlizi Məşvərət Şurası nazirlərin 11-ci və Yaşıl Enerji Məşvərət Şurası nazirləri 3-cü iclası bunun bariz nümunəsidir”.

O bildirib ki, Azərbaycan artıq uzun illərdir ki, Avropanın enerji təhlükəsizliyinin təmin olunmasında əsas ölkələrdən biri olub və bu rolunu getdikcə artırır: 

"Hazırda Azərbaycan, enerji sahəsini şaxələndirərək Avropanın enerji təhlükəsizlik arxitekturasında daha etibarlı oyunçu rolunu oynamaq üçün addımlar atır. Bakıda keçirilən bu tədbirlər. Azərbaycanın strateji hədəflərinə xidmət edir".

O qeyd edib ki, hazırda Azərbaycan Avrasiya coğrafiyasında neft-qaz xəritəsini müəyyən edib, növbəti hədəfimiz isə alternativ enerji və logistika xəritəsinin qurulmasıdır:

"Bu istiqamətdə də uğurlu addımlar atılır. Mən əminəm ki, bu siyasətin nəticəsi olaraq Azərbaycan qazı daha çox Avropa ölkəsinə çatdırılacaq. Eyni zamanda, “yaşıl enerji” sahəsində də böyük irəliləyişlər olacaq və transmilli layihələr həyata keçiriləcək.

Azərbaycan həm öz potensialından, həm də Mərkəzi Asiyanın və Xəzər hövzəsinin imkanlarından faydalanaraq Avropanın enerji təhlükəsizliyini təmin etməkdə əvəzedilməz bir ölkəyə çevriləcək.

Bu addımlar sayəsində Azərbaycan, Qərblə Şərq arasında yeni regional əməkdaşlıq formatları yaradaraq, Avrasiyanın yeni təhlükəsizlik sisteminin formalaşmasına öz töhfəsini verəcək və bu prosesdə mühüm rol oynayacaq".

Səbinə Uğur
"Cebheinfo.az"