Koreya Mərkəzi Xəbər Agentliyi (KCNA) xəbər verir ki, Şimali Koreya lideri Kim Çen In şimalda yeni bir şəhərin tikintisi layihəsinə “məsuliyyətsiz” yanaşdıqlarına görə bir neçə yüksək vəzifəli məmuru işdən çıxarıb və ya vəzifəsini aşağı salıb.

“Cebhe.info” bu barədə Koreya Mərkəzi Xəbər Agentliyinə istinadən xəbər verir.

Kim qərarını Şimali Koreyanın yeni mənzilləri, otelləri, xizək kurortu və ticarət, mədəniyyət və tibb müəssisələri ilə "sosialist utopiyası" və "yüksək sivil dağ şəhəri modeli" qurduğu Samjiyeon şəhərinə səfəri zamanı açıqlayıb. İnşaatçıları əldə etdikləri nailiyyətlərə görə yüksək qiymətləndirən KXDR lideri bildirib ki, yüksək rütbəli məmurların məsuliyyətsizliyi bir sıra ciddi yayınmalara, o cümlədən keyfiyyətsiz tikinti işlərinə və maliyyə itkilərinə səbəb olub.

O, hökumətin tikintiyə nəzarət naziri, sentyabr ayında təyin edilmiş Ri Soon-Cholu dekabr ayından bu yana tikinti meydançasına belə getməyən biri kimi qeyd edib, onu işdən kənarlaşdırıb və rəsmi araşdırmaya çağırıb.

Şimali Koreya lideri həmçinin layihənin tikinti təftişi komitəsinin bütün üzvlərini vəzifəsindən kənarlaşdırıb. Bu məsələyə cavabdeh olan hakim Fəhlə Partiyasının rəsmisini vəzifəsindən azad edib və baş nazirin müavinini və digərlərini vəzifə öhdəliklərini yerinə yetirmədiklərinə görə yenidən yoxlamağa söz verib.

"O, yerli turistlər üçün yeni tikilmiş otelləri gəzərkən, onların tikintisinin köhnəlmiş və geridə qalmış səviyyədə aparıldığını sərt şəkildə qeyd edib", - deyə KCNA bildirib.

 Xəzər
“Cebhe.info”