Bu ilin iyun ayında Avropada qazın orta qiyməti min kubmetr üçün təxminən 439 ABŞ dolları təşkil edib, bu da ötən ilin iyun ayı ilə müqayisədə 15 % çoxdur.

Bu barədə “APA-Economics” Avropa Qaz İnfrastruktur Operatorları Assosiasiyasına (Gas Infrastructure Europe, GIE) istinadən xəbər verir.

Məlumata görə, bu ilin may ayının göstəricisi ilə müqayisədə iyunda Avropada qazın qiyməti 6,7 % artıb.

Onu da qeyd etmək lazımdır ki, bu gün keçirilən hərraclar zamanı Avropada qazın 1 000 kubmetrinin qiyməti 411 ABŞ dollarını ötüb. Belə ki, 2 iyul tarixində TTF (Niderlandın "Title Transfer Facility"i Avropanın ən likvid virtual satış mərkəzi) indeksi üzrə avqust fyuçerslərinin qiyməti 411,5 dollar təşkil edib, bu da öncəki hesablama qiyməti (410,9 dollar) ilə müqayisədə 0,1% çoxdur.

Xatırladaq ki, 2020-ci il dekabrın 31-dən Trans-Adriatik boru kəməri (TAP) vasitəsilə Avropaya Azərbaycan qazının nəqlinə başlanılıb.

"Cebheinfo.az"