Elm və Təhsil Nazirliyinin ümumi və məktəbəqədər təhsilin təşkili və idarə olunması şöbəsinin müdiri Elnur Əliyev növbəti tədris ilindən 6-cı siniflərdə “Təbiət” fənninin tədris ediləcəyi, əvəzində isə biologiya və fizikanın tədris olunmayacağını deyib.

Elm və Təhsil Nazirliyindən mətbuata bildirilib ki, Azərbaycan Respublikası Nazirlər Kabinetinin 29 sentyabr 2020-ci il tarixli 361 nömrəli Qərarı ilə təsdiq edilmiş “Azərbaycan Respublikasında ümumi təhsilin dövlət standartları” sənədinə əsasən, ümumi təhsilin səviyyələri üzrə tədris olunan fənlərin siyahısında müəyyən dəyişikliklər edilib: “ümumi orta təhsil səviyyəsindən “Həyat bilgisi” fənni çıxarılaraq “Təbiət” fənni əlavə edilib.

2022-2023-cü dərs ilində ölkənin bütün V siniflərində təbiət fənni tədris olunub. 2023-2024-cü dərs ilində bütün VI siniflərdə “Təbiət” fənninin tədrisinin davam etdirilməsi nəzərdə tutulur. “Təbiət” fənninin məzmununa fizika, kimya və biologiya fənləri üzrə ilkin biliklər daxil edilib. İnteqrativ məzmunlu bu fənn VII siniflərdə tədris olunacaq fizika, kimya və biologiya fənlərinə keçid xarakteri daşıyır”.

Qeyd edilib ki, V-VI siniflərdə təbiət fənni tədris edilmiş şagirdlər IX və XI siniflərə çatdıqda müvafiq imtahanların proqramları da onların təhsil aldığı standart və mövzulara uyğunlaşdırılacaq.

Qeyd edək ki, VI siniflərdə “Təbiət” fənninin tədrisi, əvəzində isə biologiya və fizikanın tədris olunmayacağı fikri birmənalı qarşılanmayıb.

Yeni fənnin tədrisi şagirdlərin dərs yükünün azaldılmasında müsbət addım olsa da, həmin fənləri hansı fənn müəlliminin tədris edəcəyi, müəllimlərin dərs yükünün azalacağı müzakirə edilir?

Təhsil üzrə ekspert Elşən Qafarov Cebhe.info-ya bildirib ki, bu proses ötən ildən başlanılıb və V-VI siniflərində “Həyat bilgisi”nin əvəzinə “Təbiət” fənni tədris olunur:

“VI sinifdə “Həyat bilgisi” ilə yanaşı, biologiya, fizika, coğrafiya fənləri də burada öz əksini tapıb. Dərslik çox yüksək keyfiyyətlə, Sinqapur modelinə uyğun olaraq hazırlanıb. Bütün dünyada fənlərin istiqamətlər üzrə tədrisinə üstünlük verilir. Ancaq bu, o demək deyil ki, bizdə fizika, kimya, biologiya fənləri artıq tədris olunmayacaq. V-VI sinifdən həmin fənlər haqqında ilkin təsəvvürlər yaradacaq mövzular salınıb.

VII sinifdən isə dərsliyə davam edəcək. Ancaq problem ondadır ki, bunu kim tədris edəcək? Fizika, kimya, biologiya müəllimi tədris edəcək? Çox güman ki, yenə fizika, kmya, biologiya müəllimləri tədris edəcəklər”.

O bildirib ki, ümumilikdə isə yalnış anlaşma olub:

“Fənlər ləğv olunmur. VI sinifdə fənlər birləşdiriləcək və orada fizika, kimya, biologiyadan da mövzular var. Problem həmin fənni tədris edəcək müəllimlərin olmamasıdır. Yaxud da kim olması ilə bağlı bir həftəlik təlimlər lazım olan keyfiyyəti verməyəcək.

İstər-istəməz həmin dərslik Azərbaycan məktəblərində keçirilən dərsliklərə nisbətən daha keyfiyyətlidir. Ancaq fənni kimin tədris edəcəyi ilə bağlı məsələ problemlidir, kadr yoxdur. Müəllim bir fənni tədris etsə, digər fənn qalacaq. Orada eyni zamanda bir neçə fəndən mövzu var. ümumilikdə isə “Təbiət” fənnində adıçıkilən fənlərlə bağlı ilkin təsəvvür yaradan mövzular var. Arzu edərdim ki, digər dərsliklər də həmin dərslik keyfiyyətində olsun”.

Nigar Abdullayeva
Cebhe.info