Heç kimə sirr deyil ki, insanlar müxtəlif sürətlərlə qocalırlar. 

Stress, siqaret, genetik və digər amillər üzümüzdə iz buraxır. İndi süni intellektlə işləyən yeni alət sadəcə “selfie”dən istifadə edərək nə qədər tez qocaldığınızı deyə bilər.

“Cebheinfo.az” xəbər verir ki, “The Lancet Digital Health” jurnalında dərc olunan yeni araşdırmada elm adamları süni intellekt modelini öyrətmək üçün təxminən 59 000 üzün fotoşəkillərindən istifadə edib. 

Onlar insanların bioloji yaşını və ya yaşını doğum tarixinə deyil, hüceyrə sağlamlığına əsaslanaraq təxmin ediblər.“Euronews” xəbər verir ki, daha sonra onlar "FaceAge" adlı modeldən 6200 xərçəng xəstəsi üzərində istifadə ediblər.

Tədqiqatın nəticələrinə görə, xərçəng xəstələri orta hesabla öz yaşlarından təxminən beş yaş böyük görünürlər və “FaceAge” balları xərçəngi olmayan insanlara nisbətən daha yüksək olub.Qeyd edək ki, model həm də həkimlərə palliativ yardım alan xərçəng xəstələrinin qısamüddətli sağ qalması ilə bağlı daha dəqiq proqnozlar verməyə kömək edib. Yalnız ən yaxşı həkimlərin proqnozları “FaceAge”-in proqnozları qədər dəqiq idi.

Tədqiqatın müəlliflərindən biri və ABŞ-də “Mass General Brigham”-ın Tibbdə AI proqramının direktoru Huqo Aerts deyib: "İnsanın xronoloji yaşı ilə müqayisədə neçə yaşında göründüyü həqiqətən vacibdir”.

Tədqiqatçıların fikrincə, bu vasitə həkimlərə və xərçəng xəstələrinə ömürlük müalicə ilə bağlı qərarlar qəbul etməyə kömək edə bilər. Lakin ondan bir sıra digər sağlamlıq problemlərini həll etmək üçün də istifadə edilə bilər.

Tədqiqatın müəlliflərindən biri və “Mass General Brigham and Women's Hospital”-ın onkoloqu Dr.Rey Mak bildirib ki, “FaceAge” gələcəkdə sağlamlıq üçün erkən aşkarlama sistemi kimi istifadə edilə bilər.

"Müxtəlif xroniki xəstəliklərə getdikcə daha çox qocalma xəstəlikləri kimi baxdıqca, insanın qocalmasının trayektoriyasını dəqiq proqnozlaşdıra bilmək daha da vacib olur", - Mak açıqlamasında bildirib.

Amma qaydanın bəzi məhdudiyyətləri var. O, ilk növbədə açıq dərisi olan insanlar üçündür. Eyni zamanda, insanların görünüşünə təsir edən  işıqlandırma və ya makiyaj kimi amillərin nəticələrə necə təsir edə biləcəyi aydın deyil.

Xəzər
“Cebheinfo.az”