Son 20 ildə itkin düşənlərin sayı rekord həddə çatıb.

Bunu BMT İnsan Hüquqları üzrə Ali Komissarı Volker Türk Baş Assambleyada Azərbaycanın müəllifi və təşəbbüskarı olduğu “İtkin düşmüş şəxslər” mövzusu üzrə müzakirələrdə təqdim etdiyi hesabatla bağlı çıxışında qeyd edib.

V.Türk bildirib ki, 2024-cü ildə Beynəlxalq Qırmızı Xaç Komitəsi 56 559 yeni itkin düşmə hadisəsi qeydə alıb ki, bu da son illərin ən yüksək göstəricisidir: “Son 45 ildə məcburi və qeyri-ixtiyari itkin düşmələr üzrə İşçi Qrupu (Working Group on Enforced and Involuntary Disappearances) 115 dövlətdə 62 mindən çox məcburi itkin düşmə hadisəsi aşkar edib. Təəssüf ki, bu, yalnız çox böyük bir problemin görünən hissəsidir”.

Ali Komissar müharibələr, repressiyalar və insan alverinin itkin düşmə hallarının artmasına səbəb olduğunu söyləyib. Onun sözlərinə görə, bu cür hallar cəmiyyətlərə dərin travmalar yaşadır və nəsillər boyu davam edən acılara səbəb olur.

Türk itkin düşənlərin ailələrinin illərlə davam edən axtarışları və onlara qarşı təzyiqlərə diqqət çəkərək, dövlətləri beynəlxalq insan hüquqları öhdəliklərini yerinə yetirməyə çağırıb. O, xüsusilə “Bütün şəxslərin məcburi itkin düşmələrdən qorunması haqqında Beynəlxalq Konvensiya”nın daha çox ölkə tərəfindən ratifikasiya edilməsinin vacibliyini vurğulayıb:

“2006-cı ildə qəbul edilmiş konvensiya bu məsələ ilə bağlı əsas qlobal razılaşmadır. Lakin bu günə qədər cəmi 77 dövlət onu ratifikasiya edib. Mən bütün dövlətləri bu konvensiyanı imzalamağa, onu öz milli qanunvericiliyinə daxil etməyə və digər beynəlxalq insan hüquqları öhdəlikləri ilə birlikdə effektiv şəkildə həyata keçirməyə çağırıram”.

Ali Komissar, həmçinin ədalət və cavabdehlik məsələsinin əhəmiyyətini qeyd edərək, dövlətlərin itkin düşənlərin taleyini araşdırmaq və məsul şəxsləri ədalət qarşısına çıxarmaq üçün tədbirlər görməli olduğunu əlavə edib.

"Cebheinfo.az"