2021-ci il oktyabrın 1-də Gürcüstanın keçmiş prezidenti Mixail Saakaşvili “Facebook” səhifəsində belə bir post yazdı: "Sabahın xeyir, Gürcüstan! 8 il keçdi".

Saakaşvili dəfələrlə Gürcüstandakı tərəfdarlarına cinayət işinin açılmasına və həbs olunma ehtimalına baxmayaraq, ölkəyə qayıtmağa söz verdi. Həmin gün axşam saatlarında Gürcüstanın Baş naziri İrakli Qaribaşvili eks-prezidentin saxlanması barədə məlumat verdi. Sonra bu günə qədər davam edən bir "hekayə" başladı: məhkəmələr, aclıq aksiyaları, Gürcüstan hakimiyyətinin Saakaşvilini Ukraynaya ekstradisiya etməkdən imtinası, fiziki vəziyyətinin pisləşməsi, həbsxanadan xəstəxanalara köçürülməsi, zəhərlənmə ilə bağlı açıqlamalar. Yorğunluq və arıqlama səbəbindən Gürcüstanın eks liderini tanımaq mümkün deyil. Son bir neçə həftə ərzində Avropa liderləri Gürcüstan hakimiyyətindən Saakaşvilini müalicə üçün xaricə göndərməyi tələb edirlər. Eyni təklifi bu yaxınlarda Ukrayna Prezidenti Vladimir Zelenski də səsləndirib.

İki həftə əvvəl “Ukrainska Pravda” Saakaşvilinin yaxın dostu vasitəsilə keçmiş prezidentə suallar siyahısını verib.
Cebhe. info gürcü mətbuatına istinadən həmin suallara cavabları təqdim edir:

- Səhhətiniz barədə bizə məlumat verin. Siz hansı şəraitdəsiniz? Tibbi yardım alırsınız?

- Mən elə klinikadayam ki, onlar üçün çox çətin şəraitdə həkimlər mənə maksimum kömək göstərirlər. Onlarla hər gün Gürcüstanın təhlükəsizlik xidməti sorğu-sual olunur və hər dəfə tibb bacısı mənim yanıma sadə manipulyasiya üçün, məsələn, həb vermək üçün gələndə onu hərtərəfli araşdırırlar. Təsəvvür edin ki, bu, gündə 30 dəfə baş verir. Mənim “palata”mın pəncərələri qalın plyonka ilə örtülüb, yeddi aydır ki, günəş şüası görmürəm. Bu yaxınlarda ağır hipertonik böhran keçirəndə, həbsxana işçiləri məni reanimasiya şöbəsinə köçürməyə icazə vermədilər.

- Ağır metal zəhərlənməsi necə oldu və nə vaxt oldu? - Mənim zəhərlənməyim Amerikanın iki laboratoriyası və aparıcı Amerika toksikoloqu Devid Smit tərəfindən təkzibolunmaz şəkildə sübuta yetirilib. Təbii ki, bu, ilk növbədə, fevralın 24-dən sonra məlum olduğu kimi, Gürcüstanda hakimiyyətə tam nəzarət edən Putinə sərfəli idi. Hətta mənim üçün nəzarət səviyyəsi gözlənilməz oldu. Zəhərlənmə “həbsxana xəstəxanasına” məcburi köçürmə zamanı baş verib, orada qəfil ağır xəstələndim və sonradan reanimatoloqun dediyi kimi, ölməməyim möcüzə idi. Baxmayaraq ki, zəhərlənmə çox ağır simptomlar buraxdı. Əgər həbs olunanda çəkim təxminən 120 kq idisə, indi 72 kq-dır.

– Bu gün Qərb siyasətçiləri sizə kömək edirmi? Onlar sizin xilasınız üçün daha yaxşı nə edə bilərdilər?

– Məncə, onlar indi çox fəaldırlar. Avropa Parlamenti mənim zəhərlənməmlə bağlı qətnamə qəbul edib və Avropa Komissiyası çox fəaldır. Polşanın Prezidenti və Baş naziri mənim azad olunmağım üçün növbə ilə Gürcüstana uçdular. Moldova Prezidenti Mayya Sandu bir sıra açıqlamalar verib. ABŞ Dövlət Departamentinin bəyanatları var idi və bu, hələ başlanğıcdır. Amma mənim üçün əsas Prezident Zelenskinin bəyanatı oldu. Birincisi, ona görə ki, onun sözü bir çox dünya siyasətçilərinin sözündən də dəyərlidir. Gürcülər onu sadəcə olaraq bütləşdirirlər. İkincisi, bu, Ukrayna üçün çox çətin bir dövrdə ən yüksək humanizm aktı idi.

– Belə bir şəraitdə həbs və saxlanmağınıza səbəb olan Gürcüstana getmək qərarınızdan peşmansınızmı?

-Həbs olunduğuma görə peşman deyiləm, amma Ukraynada ola bilməyəcəyim və bu müharibənin fəal iştirakçısı ola bilmədiyim üçün peşmanam. Mən Ukrayna ilə oyanıram, Ukrayna ilə yuxuya gedirəm və ümumilikdə Ukraynayam.

- Nəzərə alsaq ki, Putinin sizə xüsusi “nəvazişli” münasibəti var, bu gün özünüzü harada daha təhlükəsiz hiss edərdiniz, Ukraynada, yoxsa Gürcüstan həbsxanasında?

- Gürcüstan həbsxanasında mən Putinin şəxsi məhbusuyam. Həbsxana işçiləri tez-tez mənimlə, məsələn, "Lefortovo"da olduğundan daha pis davranırlar. Eyni zamanda, Gürcüstanda insanların böyük əksəriyyəti mənə son dərəcə müsbət yanaşır. Mən bunu valideynlərimin, övladlarımın və dostlarımın dediklərindən hiss edirəm. Və mən təhlükəsizlik axtarmıram. Ukraynada mən cəbhə xəttində olardım və özümü çox xoşbəxt hiss edərdim. - Rusiyanın Ukraynaya təcavüzünə inanırsınızmı? Bu müharibədə sizi ən çox nə təəccübləndirdi?

-Uzun illər ərzində bu işğalı, o cümlədən onun əsas istiqamətlərini proqnozlaşdıranlardan biri mən olmuşam. Əvvəlki bütün çıxışlarıma baxa bilərsiniz. Amma onun Kiyevə bu qədər kiçik qüvvələrlə hücum edəcəyinə inanmırdım. Ukrayna ordusu bu gün dünya tarixinin ən yaxşı ordularından biridir.

– Bu gün dünyanın Ukraynaya necə kömək etdiyini izləyəndə özünüzə sual verirsiniz ki, 2008-ci ilin avqustunda Rusiya tankları Tbilisiyə axışarkən onlar harada idilər?

-Dünya öz dərslərini aldı və mən Qərbin, xüsusən də gələn il üçün yardımın həcmindən çox razıyam. 2008-ci ildə dövlətimizi də Amerika xilas etdi. Ona görə də şikayət edə bilmərik.

– 2022-ci ildə Ukraynada və 2008-ci ildə Gürcüstanda baş verənlər arasında oxşar və əsas fərq nədir?

-Hazırlıqlar çox oxşar idi. Amma təbii ki, miqyas baxımından bunlar fərqli şeylərdir. Nə birləşdirir? Qərbli dostlarımız da mənə təxliyə etməyi təklif etdilər, təbii ki, Putinin təklifi ilə. Amma mən Zelenski kimi bundan imtina etdim və döyüşmək qərarına gəldim.

- Bu gün Gürcüstanın belə neytral mövqeyi niyə mümkündür? Rusiyaya neçəyə başa gəlir?

-Bu, neytral mövqe deyil. Belə bir müharibədə neytrallıq ola bilməz. İndi belə bir məlumat var ki, Sergey Kiriyenko (Rusiya Prezident Administrasiyası rəhbərinin müavini - red.) Gürcüstana gəlməyə hazırlaşır, əgər o, hələ gəlməyibsə, bu müharibənin əsas ideoloqlarından biridir. Rusiya Xarici İşlər Nazirliyi Gürcüstan vətəndaşları üçün viza rejimini ləğv etmək niyyətində olduğunu açıqlayıb. Rusiya rəsmiləri və təbliğatçıları məni həbsdə saxladıqları üçün Gürcüstan hakimiyyətini daim tərifləyirlər. Gürcüstan demək olar ki, dünyanın yarısının daxil olduğu Rusiyaya dost olmayan ölkələr siyahısından rəsmən çıxarılıb. Gürcüstanda, o cümlədən gürcü dilində rəsmi olaraq Rusiyanın təbliğat kanalları fəaliyyət göstərir. Gürcüstan hakimiyyəti Ukrayna və onun rəhbərliyi haqqında daim istehzalı tonla danışsa da, heç vaxt Rusiyanın Ukraynaya təcavüzünü pisləyən bir söz deməyib. Deməli, burada neytrallıq qoxusu yoxdur. Gürcüstan hakimiyyəti təkcə Zelenskini ittiham etmir ki, guya o, məni xüsusi əməliyyata və müharibəyə başlamaq tapşırığı ilə göndərib. Amma son vaxtlar vektoru açıq şəkildə göstərən ABŞ-ı da günahlandırırlar. Gürcüstan hakimiyyətinin Tbilisidəki Prezident sarayının qarşısındakı Milad kəndini rəsmən “Rus kəndi” adlandırması hansı neytrallıqdan gedir?

- Niyə gürcülərdə Rusiyadan olan səfərbərlik qaçqınlarına qarşı rədd hissi yoxdur?

- Gürcülərin rus mühacirlərinin böyük hissəsinə qarşı böyük nifrət hissi var, o dərəcədə ki, Gürcüstan hakimiyyəti rusofobik bəyanatlara və hərəkətlərə görə cinayət məsuliyyəti tətbiq etmək niyyətindədir. Xüsusən də ingilis dilini öyrəndiyim və onları rus dilini öyrənmək məcburiyyətindən azad etdiyim gənclər Rusiyadan gələn qonaqlara açıq nifrət edirlər.

– Əgər siz Ukraynadan Gürcüstana getməsəydiniz, indi nə edərdiniz? Başqa şəraitdə bu müharibədə iştirakınızı necə görürsünüz?

- Birincisi, Çörçilldən sonrakı dövrün ən görkəmli dövlət xadimi hesab etdiyim Prezident Zelenskinin yaxını olardım. Onunla müqayisədə Reyqan və Tetçer əsəbi halda kənarda siqaret çəkirlər. Eyni zamanda, Ukraynaya dəstəyi səfərbər etmək üçün çoxlu əlaqələrimdən istifadə edərək dünyanı gəzərdim. İkincisi, mən daim cəbhə xəttinə gedərdim, həm ukraynalı, həm də gürcü döyüşçülərinə kömək edərdim. Bu yaxınlarda gürcü döyüşçüləri kollektiv müraciət yazaraq məni ad günüm münasibətilə təbrik etdilər, baxmayaraq ki, onlardan 35-nin artıq müharibədə, o cümlədən 7-nin Baxmut cəbhəsində şəhid olmasını bir an belə unutmuram. Bir çox ukraynalı dostlarım öldü və ya yaralandı. Tanıdığım ən layiqli və vicdanlı insanlardan biri, köməkçim Vladimir Çavriqi Xerson yaxınlığında öldü. Yeganə şəxsi mühafizəçim və sadəcə dostum Mişa Baturin Baxmut yaxınlığında ağır yaralandı. Mən özümü 100% ukraynalı kimi hiss edirəm.

– Bu gün Ukrayna hakimiyyətindən kimsə ilə münasibət saxlayırsınızmı? Əgər belədirsə, kiminlə?

- Prezident Aparatı ilə daimi əlaqə saxlayıram və bunu çox səmərəli hesab edirəm. Nazirlər Mixail Fyodorov, Aleksandr Kubrakov, "Naftoqaz"ın rəhbəri Aleksey Çernışov, Ali Radanın deputatları, "Xalqın qulluqçusu" fraksiyasının rəhbəri David Araxamiya ilə. Və ümumiyyətlə, Zelenskinin indi Yermakın rəhbərlik etdiyi ideal döyüş kabineti var.

-Bu müharibə Ukrayna və Gürcüstan üçün necə bitəcək? Rusiyanın itkisi, Ukraynanın qələbəsi nə olacaq?

- Müharibə Rusiyanın tam məğlubiyyəti və süqutu ilə başa çatacaq. Qələbənin konkret parametrlərini isə Vladimir Zelenski formalaşdırıb. Qələbəyə qədər yaşasam, Odessaya qayıtmaq istəyirəm - dəniz mənzərəsindən həzz almaq və dostlarımı yeməyə dəvət etmək üçün.

Qeyd edək ki, səhhətində ciddi problemlər olan Saakaşvili əlində qələm tutub yaza bilmədiyi üçün onun cavablarını yaxın dostu yazıb və "Ukrainska Pravda"-nın müxbirlərinə göndərib.

Sevinc Tapdıqqızı
Cebhe.info