2025-ci ilin “Suverenlik və Konstitusiya ili” olması münasibətilə, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə "Vətən Naminə" Şəhid Ailələrinə Dəstək İctimai Birliyi tərəfindən həyata keçirilən qrant layihəsi çərçivəsində Şəhidlərimizin övladları üçün Şuşa turuna başlanılıb.

"Cebheinfo.az" xəbər verir ki, bu gün Qarabağı azad edən Şəhidlərimizin övladları, bu torpaqları ziyarət etməyə haqq qazanıblar. Hər bir şəhidin qız və oğul övladları, nəinki atalarının qəhrəmanlığını, həm də Azərbaycan torpaqlarının azadlığı uğrunda verilən qanı, mübarizəni daha yaxından hiss edərək bu müqəddəs yeri görmək fürsəti əldə ediblər. Bu tur, Şəhidlərimizin övladları üçün əvəzsiz bir təcrübə olmaqla yanaşı, həm də onların atalarının şücaətini, ölkənin azadlığı uğrunda verdikləri əvəzsiz fədakarlığı unutmamalarını təmin edəcək.

Bir şəhid anası kimi, bu uşaqların üzlərindəki qürur, kədər və həsrət hisslərini görmək mənim üçün çox çətin anlar yaşatsa da, onları bu torpaqlara, Şuşaya gətirmək mənə qürur verir. Bu övladlar, özlərindəki gücü və vətən sevgisini hər zaman daşıyaraq, gələcək nəsillərə də bu müqəddəs hissləri ötürəcəklər. Onların gözlərindəki parıltı, həm keçmişin, həm də gələcəyin işığını əks etdirir. Bu turda iştirak edən hər bir şəhid övladı, öz atalarının qəhrəmanlığını və Qarabağın azadlığı üçün verilən mübarizənin əhəmiyyətini dərindən anlayacaq.

"Cebheinfo.az"