Amerika Birləşmiş Ştatları Türkiyə ilə danışıqlar aparır.

Məqsəd Ukraynada çox ehtiyac duyulan döyüş sursatını çatdırmaq üçün Türkiyədən partlayıcı maddələrin alışını artırmaqdır.

“Cebhe.info” xəbər verir ki, bu barədə “Bloomberg” yazır. 

Müzakirələrdən xəbərdar olan rəsmi mənbələrə görə, Türkiyənin trotil və yanacaq kimi istifadə edilən nitroquanidin tədarükü NATO standartı 155 mm-lik döyüş sursatının istehsalı üçün kritik rol oynayacaq. Bununla da potensial olaraq istehsalı üç dəfə artırmaq mümkündür.

Məlumata görə, Türkiyə artıq bu il ABŞ-yə ən çox artilleriya mərmisi satan ölkə olmaq yolundadır:

“Ankara ilə razılaşma həmçinin Rusiyanın işğalı və Türkiyənin İsveçin hərbi alyansa daxil olmasının bir neçə aydır blokadası nəticəsində münasibətləri gərginləşən NATO müttəfiqləri arasındakı incə balansı da ortaya qoyur.

Prezident Rəcəb Tayyib Ərdoğan mayın 9-da Prezident Co Baydenin vəzifəyə başlamasından sonra ilk dəfə olaraq Ağ Evi ziyarət etməyi planlaşdırır. Türkiyənin bu il İsveçin NATO-ya üzvlüyünü təsdiqləməsi Vaşinqtonun Ankaraya Amerika istehsalı olan F-16 döyüş təyyarələri, raketlər və bombalar satmaq üçün 23 milyard dollarlıq müqavilə imzalamasına yol açdı”.

Fevralın sonunda Pentaqon bəyan edib ki, “General Dynamics Ordance and Tactical Systems” ilə Texasda 155 mm-lik mərmilərin metal hissələrinin istehsalı üçün türk subpodratçıları ilə də müqavilə imzalanıb. Şirkətdən bildiriblər ki, Texas ştatının Mesquite şəhərində yerləşən zavodda istehsala iyun ayında başlaması planlaşdırılır.

“Türkiyə müdafiə firması “Repcon”un istehsal xətlərinin 2025-ci ilə qədər ABŞ istehsalı olan 155 mm-lik artilleriya mərmilərinin təxminən 30%-ni istehsal edəcəyi gözlənilir. Bundan əlavə, Müdafiə Nazirliyi bu il çatdırılmaq üçün Türkiyənin “Arca Defence” şirkətindən 116 min döyüşə hazır sursat alıb və yaxın vaxtlarda növbəti satınalmaların gələn il çatdırılması gözlənilir”, - deyə mənbələr əlavə ediblər.

Pentaqon bildirib ki, müttəfiqlərlə işləmək qlobal müdafiə sənayesi bazası qurmaq üçün açardır. Türkiyə Müdafiə Nazirliyi və Müdafiə Təchizatları Agentliyi hələlik bu məlumatı şərh etməyib.

Xəzər
“Cebhe.info”