İdman istiqaməti üzrə qabiliyyət imtahanlarında hər gün 240 abituriyentin iştirakı nəzərdə tutulub.

"Cebheinfo.az" xəbər verir ki, bunu DİM-in imtahanların Təşkili və İdarə Edilməsi departamentinin böyük məsləhətçisi Elşən Rəhimli Dövlət İmtahan Mərkəzinin jurnalistlər üçün qabiliyyət imtahanlarını müşahidə etmək məqsədilə təşkil etdiyi mediatur zamanı deyib.

"İdman istiqaməti üzrə qabiliyyət imtahanları hazırda Bakıda Azərbaycan İdman Akademiyası və Tofiq Bəhramov adına Respublika Stadionunda təşkil olunur. Regionlarda isə Tovuz, İsmayıllı və Şərur olimpiya idman komplekslərində imtahanlar keçirilir.

İmtahanlarda idman ekspertləri, Gənclər və İdman Nazirliyinin, DİM-in əməkdaşları və könüllülər iştirak edir",- o qeyd edib.

E.Rəhimli onu da bildirib ki, imtahanlar 4 normativ üzrə götürülür. İmtahan nəticələri imtahanın səhəri günü şəxsi kabinetdə görünür. Bundan əlavə, abituriyentlər imtahandan dərhal sonra apellyasiyaya müraciət edə bilərlər.

O vurğulayıb ki, təkrar imtahan üzrə müraciətlərə baxılmır.

"Cebheinfo.az"