Quba Regional Qeyri-Hökumət Təşkilatlarının Resurs və Təlim Mərkəzi İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi ilə “Bölgələrdə fəaliyyət göstərən QHT-lərə yardım” layihəsinə start verib.

14 avqust 2024-cü il tarixində Quba Regional Qeyri-Hökumət Təşkilatlarının Resurs və Təlim Mərkəzi İctimai Birliyi, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin elan etdiyi orta qrant proqramı çərçivəsində maliyyələşdirilən “Bölgələrdə fəaliyyət göstərən QHT-lərə yardım” layihəsinin icrasın başlanılıb. Bu layihə bölgələrdə fəaliyyət göstərən qeyri-hökumət təşkilatlarının (QHT) potensialının artırılması və onların layihə hazırlığı sahəsindəki bacarıqlarının inkişaf etdirilməsini hədəfləyir.

Layihə çərçivəsində ilk təlim sessiyası Xaçmaz və Şabran rayonlarında fəaliyyət göstərən ictimai birliklərin nümayəndələri üçün təşkil edilmişdir. Təlimin əsas mövzusu “Məntiqi Çərçivə əsaslı layihə təkliflərinin hazırlanması” olub. Bu mövzu, layihələrin effektivliyini və davamlılığını təmin etmək üçün vacib olan məntiqi çərçivənin necə hazırlanacağını əhatə edir.

Təlimdə Xaçmaz və Şabran rayonlarında fəaliyyət göstərən 17 nəfər ictimai birlik nümayəndəsi iştirak etmişdir. İştirakçılar arasında müxtəlif sahələrdə fəaliyyət göstərən QHT təmsilçiləri, layihə menecerləri və digər əlaqəli şəxsiyyətlər yer alıb. Təlimin məqsədi, bölgələrdəki QHT-lərin layihə təklifləri hazırlayarkən daha strukturlaşdırılmış və məntiqi yanaşmalar tətbiq etmələrinə kömək etməkdir ki, bu da onların maliyyə dəstəyi almaq şansını artıracaqdır.

Bu cür tədbirlər vasitəsilə, Quba Regional Qeyri-Hökumət Təşkilatlarının Resurs və Təlim Mərkəzi İctimai Birliyi, ölkənin bölgələrində fəaliyyət göstərən QHT-lərin daha güclü və təsirli olmasına dəstək verməyi qarşısına məqsəd qoyur. Layihə çərçivəsində digər bölgələrdə də təlimlərin keçirilməsi planlaşdırılır və bununla QHT-lərin ümumi fəaliyyət səviyyəsini artırmaq hədəflənir.

"Cebheinfo.az"