Avstraliyada meşə yanğınları davam edir

Avstraliyada meşə yanğınları davam edir

Avstraliyanın Viktoriya ştatında cümə axşamı baş verən meşə yanğınları nəzarət altına alına bilmir.

"Cebhe.info" xəbər verir ki, meşə yanğınları səbəbindən ştatın qərbində yaşayan yüzlərlə insan üçün təxliyə xəbərdarlığı edilib.

Əraziyə ən azı min yanğınsöndürən və 50 ədəd helikopter də yanğınsöndürmə işlərinə cəlb edilib. Hazırda meşə yanğınları səbəbindən 2 min adam yaşayış sahələrini tərk edib. Təxminən 16 min hektar ərazi kül olub, 3 ev isə yanıb.

Yanğınla mübarizə aparan yanğınsöndürənlər ərazidə temperaturun yüksəlməsindən narahatdırlar.

Belə ki, çərşənbə günü havanın temperaturunun 40 dərəcəyə yüksələcəyi gözlənilərkən, Beaufort və Elmhurst şəhərlərində baş verən yanğınların güclü külək səbəbindən geniş ərazilərə yayılacağından qorxulur.

Xatırladaq ki, 2019-2020-ci illərdə Avstraliyada “Qara yay” kimi tarixə düşən meşə yanğınları Türkiyə böyüklüyündə bir ərazini məhv etmiş, 33 nəfərin və 3 milyard heyvanın ölümünə səbəb olmuşdu.

Nigar Hacılı 
"Cebhe.info"