Tailandın Baş naziri Phethonqthan Çinavat etimadsızlıq votumundan uğurla yayınaraq hökumətdə koalisiyanı qoruyub saxlaya bilib.

Bu barədə “Reuters” məlumat yayıb.

Etimadsızlıq votumu P.Çinavatın seçilməsindən yeddi ay sonra mandatının yoxlanılması nəticəsində irəli sürülüb.

Agentliyin məlumatına görə, ictimai rəy sorğularında reytinqlərin aşağı olmasına və iqtisadi artımın regional qonşuların iqtisadi göstəricilərindən əhəmiyyətli dərəcədə geri qalmasına baxmayaraq, bu gün keçirilən səsvermə göstərdi ki, baş nazirin 11 partiyalı koalisiyası dayanıqlıdır ki, bu da iki onillik ərzində siyasi qeyri-sabitliyə məruz qalan ölkədə vəziyyətin destabilləşməsi ehtimalını azaldır.

"İstər lehinə, istərsə də əleyhinə olan hər bir səs mənim və Nazirlər Kabinetinin xalqın rifahı naminə işimizi davam etdirməyimiz üçün güc olacaq", - P.Çinavat sosial şəbəkə hesabında yazıb.

"Cebheinfo.az"