Hindistanın Telinqana ştatında “Miss World” gözəllik müsabiqəsi ilə bağlı meymunların kütləvi tutulması aksiyası həyata keçirilir.

"Cebheinfo.az" xəbər verir ki, bu barədə "Deccan Chronicle" nəşri məlumat yayıb.

Bildirilir ki, mayın 14-də müsabiqə iştirakçıları UNESCO-nun Ümumdünya İrsi Siyahısına daxil edilmiş Ramappa məbədini ziyarət edəcəklər.

Məbəd təkcə tarixi əhəmiyyəti ilə deyil, həm də ziyarətçilərə tez-tez hücum edən aqressiv meymunlarla tanınır.

Qonaqların təhlükəsizliyini təmin etmək üçün yerli hakimiyyət “Meymun əməliyyatı” adlı kampaniya başladaraq vəhşi meymunların tutulmasına qərar verib.

Artıq 150-dən çox meymun tutulub və Telinqananın "Eturunaqram" adlı qoruq meşəsinə aparılaraq orada sərbəst buraxılıb.

Aqressiv primatların yaratdığı problemlərdən əziyyət çəkən yerli sakinlər isə bu təşəbbüsü müsbət qarşılayıblar.

Səbinə Uğur
"Cebheinfo.az"