İsrail və İran arasında qarşılıqlı hücumlardan sonra İsrailin Baş naziri Benyamin Netanyahunun təhlükəsizlik kabinetini toplayacağı bildirilib.

"Cebheinfo.az" xəbər verir ki, İsrailin "Yedioth Ahronoth" qəzetinin məlumatına görə, təhlükəsizlik kabinetinin iclası saat 11:00-da keçiriləcək.

Qeyd olunur ki, İsrail ordusu qarşıdurmanın davam etməsi ehtimalına hazır vəziyyətdədir və Netanyahu ilə müdafiə naziri Katz gecə saatlarında hərbi rəsmilərlə məsləhətləşmələr aparıblar. İddialara görə, İranın raket hücumlarına cavab tədbirlərinin görülməsi barədə qərar da məhz bu məsləhətləşmələr zamanı qəbul olunub.

Bildirilir ki, İrandan gələcək mümkün hücumlara “güclü” şəkildə cavab veriləcək. Həmçinin vurğulanır ki, əgər Lebanondan İsrailə qarşı hər hansı hücum baş verərsə, paytaxt Beyrutun Dahiyə bölgəsi hədəfə alına bilər.

İsrail ordusu atəşkəsə baxmayaraq, Beyrutun Dahiyə bölgəsinə hava zərbəsi endirmişdi. İran rəsmiləri isə bu hücuma etiraz edərək cavab verəcəklərini açıqlamışdılar.

Gecə saatlarında İran tərəfindən üç dalğa şəklində buraxılan raketlər səbəbindən İsrailin şimalındakı bir sıra şəhərlərdə hava həyəcan siqnalları səslənib. İranın İsrailə təxminən 10 raket atdığı bildirilib.

İsrail ordusu İranın qərb və mərkəzi bölgələrinə zərbələr endirdiyini açıqlayıb. Tehran isə bu hücumlara yeni raket dalğası ilə cavab verib.

Nigar Hacılı 
"Cebheinfo.az"