İngiltərədə bu il qızılca səbəbindən 2 uşaq həyatını itirib.

"Cebheinfo.az" xəbər verir ki, İngiltərə Səhiyyə Təhlükəsizliyi Agentliyinin (UKHSA) yaydığı yazılı açıqlamada belə qeyd olunub. Uşaqlardan biri “kəskin qızılca” səbəbindən vəfat edib, digər uşağın ölümü isə xəstəliyin sonrakı ağırlaşmaları ilə əlaqələndirilib.

Açıqlamaya görə, son dövrlərdə qeydə alınan qızılca hallarının böyük hissəsi paytaxt London və Vest Midlends bölgəsindəki yoluxma ocaqları ilə bağlıdır. Xəstəliyə daha çox 10 yaşdan kiçik və peyvənd olunmamış uşaqlarda rast gəlinir.

Bundan əlavə, yeni məlumatlara əsasən, son iki həftə ərzində İngiltərə üzrə 100-dən çox yeni qızılca halı təsdiqlənib.

UKHSA-nın ekspert epidemioloqu doktor Vanessa Saliba bildirib ki, qızılca ölkənin bir çox bölgəsində yayılmaqda davam edir. Bu xəstəlik ciddi, hətta ölümcül nəticələrə səbəb ola bilər.

Saliba valideynlərə müraciət edərək, uşaqlarının peyvəndlərinin vaxtında vurulduğundan əmin olmalarını tövsiyə edib. O vurğulayıb ki, peyvənd qızılcaya qarşı ən təhlükəsiz və effektiv qorunma üsuludur.

İngiltərənin səhiyyə naziri Ceyms Mürrey isə bu ölümlərin qızılcanın zərərsiz uşaq xəstəliyi olmadığını göstərən “ürəkdağlayan xatırlatma” olduğunu deyib.

Nazirin sözlərinə görə, qızılca ölümcül ağırlaşmalara səbəb ola bilər və MMR peyvəndi bu son dərəcə yoluxucu xəstəliyə qarşı ən etibarlı müdafiə vasitəsi olaraq qalır.

Məlumata görə, İngiltərədə MMR peyvəndi ilə əhatə səviyyəsi hələ də Ümumdünya Səhiyyə Təşkilatının (ÜST) müəyyən etdiyi 95 faiz hədəfindən aşağıdır.

Son rəsmi statistikaya əsasən, uşaqların 88,9 faizi ilk doza peyvəndi 2 yaşına qədər alır. Beş yaşlı uşaqların isə yalnız 83,7 faizi tövsiyə olunan hər iki dozanı qəbul edib.

Nigar Hacılı 
"Cebheinfo.az"