Ukrayna Təhlükəsizlik Xidməti (SBU) Polşanın Jeşuv şəhərində Prezident Volodimir Zelenskiyə qarşı planlaşdırılan sui-qəsdin qarşısını birgə əməliyyatla alıb.

"Cebheinfo.az" xəbər verir ki, SBU rəhbəri Vasiliy Malyukun sözlərinə görə, sui-qəsdi planlaşdıran şəxs Sovet ideologiyasına sadiq qalan keçmiş bir polşalı hərbçidir.

Rəsmi məlumata əsasən, Polşa təhlükəsizlik qüvvələri ilə koordinasiyalı həyata keçirilən əməliyyat nəticəsində şübhəli şəxs uğurla saxlanılıb. Malyuk bildirib ki, bu peşəkar birgə əməliyyat sayəsində potensial faciənin qarşısı alınıb. İlkin araşdırmalar göstərib ki, hücumda FPV pilotsuz uçan aparatı və ya snayper tüfəngindən istifadə  planlaşdırılırmış. Şübhəlinin Rusiya meyilli fikirlərə sahib olduğu vurğulanıb.

Hadisə Ukrayna liderinin üzləşdiyi təhlükəsizlik risklərini bir daha gündəmə gətirib. Müharibənin başlanmasından bu yana Zelenskiyə qarşı onlarla sui-qəsd cəhdi ifşa olunub. Xüsusilə xarici səfərlər zamanı təhlükəsizlik tədbirlərinin maksimum səviyyəyə çatdırıldığı bildirilir. Jeşuv hava limanı isə Qərbdən gələn hərbi yardımların əsas paylayıcı mərkəzi olduğu üçün strateji əhəmiyyət daşıyır.

Sui-qəsdin NATO üzvü olan bir ölkədə baş verməsi hadisəyə əlavə əhəmiyyət qazandırır. 

SBU rəsmiləri bu hadisədən sonra Prezident Zelenski və yüksək rütbəli rəsmilər üçün əlavə təhlükəsizlik tədbirlərinin görüldüyünü bildiriblər.

Xüsusilə FPV dronlarına qarşı radioelektron mübarizə sistemləri gücləndirilib. Kəşfiyyat şəbəkələri genişləndirilib ki, potensial sui-qəsd planları daha tez müəyyən edilsin.

Zelenskinin ictimai tədbirlərdəki hərəkət marşrutları yenidən planlaşdırılıb və xarici səfər protokolları nəzərdən keçirilib.

Nigar Hacılı 
"Cebheinfo.az"