Azay Quliyev yenidən ATƏT PA-nın Komitə sədri seçilib

"Cebheinfo.az" xəbər verir ki, Azərbaycanın nümayəndə heyətinin üzvü Azay Quliyev Niderlandın Haaqa şəhərində keçirilən ATƏT Parlament Assambleyasının 33-cü İllik Sessiyası çərçivəsində yekdilliklə ATƏT PA-nın İqtisadi Məsələlər, Elm, Texnologiya və Ətraf Mühit üzrə Ümumi Komitəsinin sədri və Büro üzvü vəzifəsinə yenidən seçilib.

Azay Quliyev göstərilən yüksək etimada görə ATƏT-ə üzv ölkələrə təşəkkürünü bildirib. O qeyd edib ki, 2013-cü ildən bu günədək üç dəfə ATƏT PA-nın Birinci Komitəsinin sədr müavini, iki dəfə Assambleyanın vitse-prezidenti və beş dəfə İqtisadi Məsələlər, Elm, Texnologiya və Ətraf Mühit üzrə Ümumi Komitəsinin sədri seçilib.

"Son 13 il ərzində ona göstərilən davamlı etimadı yalnız şəxsi nailiyyət kimi deyil, Assambleyanın fəaliyyətinin gücləndirilməsi, ATƏT məkanında dialoqun, əməkdaşlığın və qarşılıqlı hörmət dəyərlərinin təşviqi istiqamətində böyük məsuliyyət kimi qiymətləndirir" - o bildirib.

Onun sözlərinə görə, geosiyasi və geoiqtisadi qeyri-müəyyənliyin, sürətli texnoloji dəyişikliklərin, iqlim dəyişikliyinin, ekoloji problemlərin və təhlükəsizlik çağırışlarının artdığı indiki dövrdə parlament diplomatiyasının rolu daha da ön plana çıxır. Onun sözlərinə görə, fikir ayrılıqlarına baxmayaraq, parlamentlərin dialoqu təşviq etməsi, qarşılıqlı etimadı möhkəmləndirməsi və ortaq həll yolları axtarması xüsusi əhəmiyyət kəsb edir.

Çıxışının sonunda Azay Quliyev bütün nümayəndə heyətlərinə qarşı bundan sonra da ədalətli, qərəzsiz və məsuliyyətli fəaliyyət göstərəcəyini bildirib. O, rəhbərlik etdiyi komitənin ATƏT Parlament Assambleyasında konstruktiv əməkdaşlıq, səmərəli dialoq və praktik nəticələrin əldə olunması üçün mühüm platforma kimi fəaliyyətini daha da gücləndirəcəyinə əminliyini ifadə edib.

"Cebheinfo.az"