Avropa liderləri hesab edirlər ki, bir gün Rusiya ilə münasibətləri normallaşdırmaq lazım gələcək. 

"Cebheinfo.az" xəbər verir ki, bu fikri Finlandiya Prezidenti Aleksander Stubb “Die Welt” qəzetinə verdiyi müsahibəsində bildirib.

Jurnalist ondan soruşub ki, “Avropa üçün Rusiya ilə yaxınlaşma gələcək plan ola bilərmi?”

“Geniş çərçivədə baxdıqda, bəli, amma bu, hər şeydən əvvəl Ukraynada atəşkəsin əldə olunub-olunmamasından və sülh danışıqlarının nə vaxt başlayacağından asılı olacaq”, - deyə Stubb cavab verib.

O əlavə edib ki, hazırda elə bir mərhələdəyik ki, Avropa liderlərinin əksəriyyəti düşünür ki, bir gün Rusiya ilə yenidən yaxınlaşmaq lazım olacaq:

"Amma bu, mütləq şəkildə müttəfiqlərlə, xüsusən də Fransa, Birləşmiş Krallıq və Almaniya ilə sıx əməkdaşlıq şəraitində həyata keçirilməlidir”.

Stubb onu da qeyd edib ki, Finlandiya Rusiyadan birbaşa hərbi təhlükə hiss etmir.

“Təhlükə ilə bağlı analiz aparanda mənim tövsiyəm budur. Gələcəyi proqnozlaşdırmağa çalışmayın. Heç kəs bilmir sabah başına nə gələcək. Əvəzində silahlı qüvvələri gücləndirməyə və müdafiəni möhkəmləndirməyə diqqət yetirməliyik ki, baş verə biləcək bədbəxt hadisənin qarşısı alınsın”, - deyə vurğulayıb.

Daha əvvəl Stubb bildirmişdi ki, Avropa ölkələri Parisdə keçirilən “istəkli ölkələr koalisiyası” sammitində Rusiya ilə dialoqun mümkün bərpası barədə fikir mübadiləsi aparıblar.

Lakin o, bu istiqamətdə konkret bir tarixin olmadığını və gələcək əlaqələrin koordinasiyalı şəkildə aparılmasının vacib olduğunu qeyd etmişdi.

Səbinə Uğur 
"Cebheinfo.az"