Ali məktəblərə qəbul prosesi başa çatıb. Artıq universitetlərə qəbul olan tələbələr üçün vacib olan amil onların harada yerləşəcəyidir. 

Hazırda ən çox tələbənin təhsil aldığı ali təhsil ocaqlarından biri Bakı Dövlət Universitetidir.  BDU-da təhsil alan tələbələrin qalması üçün müvafiq yer varmı, mövcud yataqxanada qalmaq üçün tələbə nə qədər ödəniş etməlidir? 

Məsələ ilə bağlı BDU-dan “Cebheinfo.az”-a bildirilib ki, 2024-2025-ci tədris ili üzrə Bakı Dövlət Universitetinə (BDU) ilkin olaraq 5608 nəfər qəbul olub: 

“BDU-nun Tələbə Evi 220 nəfərlikdir. Ən son, modern təmir olunmuş tələbə evidir. Bütün zəruri şərait var. Çamaşırxana, internet, oxu zalı, idman sahəsi, tibb məntəqəsi, 24 saat təhlükəsizlik kameraları və s. Əsasən şəhid, qazi övladları, valideynlərini itirmiş, sosial həssas qrupa aid olanların övladları və s. qəbul edilir. Bir nəfər üçün qiymət 75 manatdır. Yeni yataqxananın inşaası istiqamətində də dövlət-özəl əməkdaşlıq çərçivəsində müzakirələr gedir”. 

Nigar Abdullayeva 
“Cebheinfo.az”