“İnanıram ki, Donald Trampın müşaviri Stiv Vitkof Rusiyanın strategiyasını qəbul edib”.

“Qafqazinfo” xəbər verir ki, Ukrayna Prezidenti Volodimir Zelenski belə bir iddia ilə çıxış edib.

Zelenski ABŞ-nin xüsusi elçisi Stiv Vitkofu Moskva ilə aparılan sülh danışıqlarında Rusiya təbliğatını yaymaqda və səlahiyyətlərini aşmaqda ittiham edib:

“O, şüurlu şəkildə rus rəvayətlərini yayır. İstənilən halda, xeyri yoxdur. Mən onun Ukrayna əraziləri haqqında danışması üçün heç bir mandat görmürəm. Bu torpaqlar bizim xalqımıza, millətimizə və ukraynalıların gələcək nəsillərinə aiddir. Dediyim kimi, biz qeyd-şərtsiz atəşkəs barədə müzakirələr aparırıq və bu baş verənə qədər biz əraziləri müzakirə etməyəcəyik. Siz mənim mövqeyimi və qırmızı xətlərimizi bilirsiniz: biz müvəqqəti olaraq işğal olunmuş ərazilərimizin heç birini Rusiya ərazisi kimi tanımayacağıq”.

Ukrayna lideri ABŞ rəhbərliyini Moskvaya daha çox təzyiq göstərməyə çağırıb:

 “Rusiya yekun danışıqlarda öz mövqeyini gücləndirmək üçün mümkün qədər çox ərazi əldə etmək istəyir. Biz bunu hücum dalğalarında raket zərbələrində görəcəyik. Onlar vəziyyəti qızışdırırlar. Sanksiyalar nə qədər sərt olarsa, atəşkəsə bir o qədər yaxın olarıq”.

"Cebheinfo.az"