2025-ci il mayın 1-dən etibarən QHT-lərə Dövlət Dəstəyi Agentliyinin maliyyə dəstəyi ilə “Ahəng Psixologiya Reabilitasiya İnkişaf Mərkəzi” tərəfindən həyata keçirilən “Qazi və Şəhid Xanımlarına Psixoloji Dəstək” layihəsinə start verilir.

"Cebheinfo.az" QHT.az-a istinadən xəbər verir ki, layihənin əsas məqsədi – Vətən Müharibəsi qazilərinin həyat yoldaşları və şəhidlərin xanımlarına psixoloji dayaq olmaq, onların sosial adaptasiyasını gücləndirmək, emosional yükünü azaltmaq və psixoloji sağlamlığını bərpa etməyə yönəlmiş sistemli dəstək mexanizmi yaratmaqdır.
Layihənin müddəti:

 •    1 may – 31 may 2025: Hazırlıq mərhələsi (mütəxəssislərin seçimi, iştirakçıların müəyyənləşdirilməsi, proqramların hazırlanması)

•    1 iyun – 15 iyul 2025: Aktiv fəaliyyət mərhələsi
•    3 fərqli qrup üzrə qrup terapiyaları keçiriləcək
•    2 mövzu üzrə təlimlər təşkil olunacaq
•    15 iyul – 31 iyul 2025: Hesabat və qiymətləndirmə mərhələsi

Faydalana biləcək iştirakçı sayı:

Layihə çərçivəsində ümumilikdə 50 xanım – şəhidlərin xanımları və qazilərin həyat yoldaşları – pulsuz psixoloji dəstək alacaq.
Psixoloji dəstək sessiyaları peşəkar psixoloqlar və terapevtlər tərəfindən aparılacaq, müasir psixoloji yanaşmalara əsaslanacaq və iştirakçıların ehtiyaclarına uyğun şəkildə təşkil ediləcək.

Layihənin ictimai əhəmiyyəti:

Bu təşəbbüs şəhid və qazi ailələrinin qadın üzvlərinin psixoloji rifahının gücləndirilməsinə, sosial həyata aktiv inteqrasiyasına və psixoloji dəstək mexanizmlərinin cəmiyyətə tanıdılmasına xidmət edir.

"Cebheinfo.az"