“Ukraynanın timsalında taleyin hökmü ilə Rusiya ilə Qərb arasında geosiyasi qarşıdurma xəttində dayanan, milli maraqların arxasınca getməyi dayandıran və Qərbin özünü destruktiv geosiyasi ssenarilərin həyata keçirilməsi alətinə çevirməyə imkan verən bir ölkənin başına nələr gələ biləcəyini açıq şəkildə göstərir”.

“Cebheinfo.az” xəbər verir ki, Rusiyanın Ermənistandakı fövqəladə və səlahiyyətli səfiri Sergey Kopırkin bu barədə İrəvanda müzakirələr zamanı bildirib.

Onun sözlərinə görə, Rusiya Avropa qitəsində və bütövlükdə dünyada vəziyyətin deeskalasiyasını və sabitləşməsini istəyən, Rusiyanın qanuni təhlükəsizlik tələblərini nəzərə almaqla Ukrayna münaqişəsinin davamlı və uzunmüddətli həlli üzərində əsaslı şəkildə işləməyə hazır olan Qərb elitasının məsul nümayəndələri ilə konstruktiv qarşılıqlı fəaliyyətə hazırdır.

Kopırkin əlavə edib ki, Ukrayna böhranından Rusiyanı beynəlxalq səhnədə siyasi və iqtisadi cəhətdən təcrid etmək üçün istifadə etmək cəhdləri tamamilə fiaskoya uğrayıb.

“Dünyanın əksər dövlətləri kollektiv Qərbin yolu ilə getmir və Rusiya ilə münasibətləri gücləndirir. Qlobal Cənub və Şərq xalqları başa düşürlər ki, suveren və güclü Rusiya ədalətli çoxqütblü dünya nizamının formalaşmasında ən mühüm amildir”, - deyə səfir vurğulayıb.

Müşfiq Abdulla
“Cebheinfo.az”