2030-cu ilə qədər Azərbaycanda qoyun əti istehsalının 9 % artırılması nəzərdə tutulur.

"Report"un Saatlıya ezam olunmuş müxbiri xəbər verir ki, bunu kənd təsərrüfatı nazirinin müavini İlhamə Qədimova "Kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı" çərçivəsində keçirilən Mil-Muğan iqtisadi rayonu üzrə regional müşavirədə bildirib.

Onun sözlərinə görə, qoyunçuluq Dövlət Proqramında xüsusi yer tutur: "2030-cu ilə qədər qoyunların sayının 10 % artırılması, illik ixtacın 2,9 min tona çatdırılması və özünütəminetmə səviyyəsinin 7 % artırılması nəzərdə tutulur. Bu istiqamətdə 300 yeni yarım-intensiv qoyunçuluq təsərrüfatının yaradılması planlaşdırılır. Bu model ənənəvi qoyunçuluqdan daha məhsuldar və daha idarəolunan istehsal sisteminə keçidi təmin edəcək.

Eyni zamanda 10 yun toplama məntəqəsinin və 1 yun emalı müəssisəsinin yaradılması nəzərdə tutulur. Bu, qoyunçuluqda əlavə dəyər zəncirinin formalaşdırılması baxımından mühüm əhəmiyyət daşıyır. Beləliklə, yalnız ət istehsalı deyil, yun, dəri və digər yan məhsulların da iqtisadi dövriyyəyə cəlb olunması təmin ediləcək".

"Yem istehsalının müasir texnika və texnologiyalarla təminatının yaxşılaşdırılması da qoyunçuluğun inkişafı üçün əsas istiqamətlərdəndir. Bundan başqa, 480 min hektar örüş və otlaq sahəsinin bərpasının təşviqi nəzərdə tutulur. Otlaqların bərpası heyvandarlığın davamlılığı üçün vacibdir. Çünki otlaq sahələri deqradasiyaya uğradıqda heyvanların məhsuldarlığı azalır, yem xərcləri artır və təsərrüfatların rentabelliyi aşağı düşür", - deyə nazir müavini əlavə edib.

Onun sözlərinə görə, qoyunçuluqda xarici investisiyaların cəlbi üçün aqroparklar yaradılacaq: "Bu təşəbbüs sektorun müasir idarəetmə modelləri, qabaqcıl texnologiyalar və geniş bazar imkanları əsasında inkişafına töhfə verəcək. Həmçinin heyvanlar üçün içməli su təminatının yaxşılaşdırılması məqsədilə 100 subartezian quyusunun qazılmasının dəstəklənməsi nəzərdə tutulur. Bu tədbir xüsusilə yaylaq-qışlaq sistemi ilə işləyən təsərrüfatlar, yarımintensiv heyvandarlıq və su çatışmazlığı olan ərazilər üçün mühüm dəstək olacaq".

"Cebheinfo.az"