Son illər ölkəmizdə imzalanan əfv sərəncamları yüzlərlə məhkuma yeni həyat imkanı tanıyır və ailələrə sevinc bəxş edir.

Bu sərəncamlar özəlliklə bayram ərəfələrində imzalanır.

Qeyd edək ki, artıq bir müddətdir ki, Azərbaycan Respublikasının Prezidenti yanında Əfv Məsələləri Komissiyasının iclasları keçirilir. İndiyədək neçə iclas keçirilib, nə qədər işə baxılıb və əfvin amnistiya ilə əvəz olunacağı gözlənilirmi? 

Məsələ ilə bağlı Azərbaycan Respublikasının Prezidenti yanında Əfv Məsələləri Komissiyasının üzvü, Milli Məclisinin deputatı, İnsan hüquqları komitəsinin sədri Zahid Oruc "Cebheinfo.az"a bildirib ki, Azərbaycan Respublikasının Prezidenti yanında Əfv Məsələləri Komissiyasının iclasları davam edir: 

"Ümumi müzakirələrin də qapalı aparılması səbəbləri baş verən cinayətin müxtəlif iştirakçıları, motivləri və digər cəhətləri ilə bağlıdır ki, buna görə də geniş məlumatlar verilmir. Düşünürük ki, proses mayın 28-ə qədər davam edəcək.

Ötən illər ərazində dövlət başçısı tərəfindən, Ulu Öndərdən başlayan əfv və amnistiya kursu 10 minlərlə insanın azadlığına şərait yaradıb. Eləcə də birliyi, həmrəyliyi gücləndirib və dövlət-vətəndaş münasibətlərində mühüm bir hadisəyə çevrilib. Hüquq sisteminin humanistləşməsinə yol açıb.

Bu baxımdan əfv siyasəti özlüyündə dövlətimizin millətimiz üçün həyata keçirdiyi ən mühüm humanist siyasətlərdən biridir. Ona görə də proses hələ ki, davam edir. Konkret nə qədər işə baxıldığı barədə fikir söyləmək mənim üçün çətindir.

Ümumimiyyətlə, sərəncamın nə vaxt olacağı ilə bağlı konkret fikir demək çətindir. Ötən dəfə Ulu Öndərin yubileyi ilə bağlı elə bir amnistiya aktı icra olunmuşdu. Bu da özlüyündə Ulu Öndərin bu siyasəti başlayan və "Konstitusiya və suverenlik ili" çərçivəsində həyata keçirilən ən mühüm addımlardan biri olardı.

Əfvlə bağlı bu il başlanan iclasların beşincisidir. Ona görə də müzakirələrin gedişi onu deməyə əsas verir ki, bu may ayına qədər çəkəcək və ondan sonra da qərar icra olunacaq. Yekunda əfv qərarı olacaq".

Nigar Abdullayeva
"Cebheinfo.az"