“Almaniya prezidentinin Azərbaycana səfəri ərəfəsində yaşanan qalmaqal - onun Ermənistana səfəri çərçivəsində özünün rəsmi “İnstagram” səhifəsində Azərbaycanın işğal olunmuş ərazilərində yaradılmış keçmiş qondarma rejimin “bayrağını” yerləşdirərək ölkəmizin ərazi bütövlüyü və suverenliyinə qarşı paylaşım etməsi texniki cəhd kimi qələmə verilsə də, buna böyük şübhələr var.

Xatırlatmaq istəyirəm ki, Almaniya rəsmilərinin Azərbaycana münasibətdə belə anlaşılmaz və qərəzli davranışları birinci dəfə deyil”. 
Bunu Qulamhüseyn Əlibəyli bildirib. Onun fikrincə, təxminən 2 il bundan əvvəl Almaniya Kansleri Şolts Ermənistanın baş naziri Paşinyanı qəbul edərkən “Dağlıq Qarabağ xalqının” vətəndaş hüquqları haqqında danışmış, bu barədə rəsmi məlumat yayıldıqdan 2-3 saat sonra saytdan silinmişdi:

“Bir müddət sonra Almaniyanın xarici işlər naziri xanım Berbok Azərbaycanın xarici işlər naziri ilə birgə mətbuat konfransında Xankəndi və Şuşa səhərlərini ermənilərin qoyduğu uydurma adlarla adlandırmış, COP29 sammiti çərçivəsində Bakıya gəlməmişdən əvvəl Ermənistana səfəri zamanı Azərbaycandan könüllü getmiş erməni əsilli şəxslərlə “Qarabağdan olan qaçqınlar” adı ilə görüş keçirmiş, “binokl diplomatiyası” adlanan qalmaqallı bir hərəkətə də yol vermişdi.

Azərbaycana səfəri zamanı isə jurnalistlərin Qərbi Azərbaycan İcması ilə görüşüb-görüşmədiyi barədə sualına əvvəlcə Ermənistanda “Qarabağdan olan qaçqınlar”la görüşü barədə uzun-uzadı danışmış,  sonradan Azərbaycanın xarici işlər nazirinin təkidindən sonra Azərbaycanda vətəndaş cəmiyyəti ayrı-ayrı nümayəndələri ilə görüşünü  guya İcma ilə də  görüş kimi qələmə verməyə çalışmışdı”. 

Qulamhüseyn Əlibəyli daha sonra bildirib ki, bütövlükdə, Almaniya prezidentinin həm Ermənistana, həm də Azərbaycana səfərləri və bu səfərlər  çərçivəsində verdiyi sülhə çağırışlarla bağlı bəyanatları təmsil etdiyi dövlətin Cənubi Qafqazda fəal rol almaq istəyindən irəli gəlsə də pozitiv məqamlara da malikdir.

“Cebheinfo.az”