Bursa vilayətinin İznik şəhərində xristian dünyasının ən önəmli hadisələrindən biri sayılan Birinci Nikea Şurasının 1700 illiyi ilə bağlı silsilə tədbirlər keçirilib.

"Cebheinfo.az" xəbər verir ki, bu münasibətlə şəhərdə beynəlxalq tədbirlər, ziyarət proqramları və arxeoloji sərgilər təşkil olunub. Tədbirlər çərçivəsində Roma Papası XIV Leo-nun İznikə rəsmi səfəri də gündəmdədir.

İznik – qədim Nikea şəhəri, 325-ci ildə keçirilmiş Birinci və 787-ci ildə baş tutmuş Yeddinci Ümumdünya Kilsə Şuraları ilə xristian tarixində mühüm yer tutur. Məhz burada qəbul edilən “Nikea Etirafı” bu gün də bir çox xristian məzhəblərində əsas teoloji sənəd olaraq qalır.

Şəhərin İznik gölü altında qalmış bazilika qalıqları, Ayasofya Məscidi, antik divarları, Roma Teatrı, erkən dövr kilsələrinin xarabalıqları, həmçinin İznik Muzeyi və Yaşıl Məscid kimi məkanlar ziyarətçilərə zəngin mədəni-tarixi irsi təqdim edir.

İznik UNESCO-nun Dünya İrsi Namizəd Siyahısında yer alır və “Cittaslow” statusuna malikdir. İstanbuldan təxminən 2,5 saatlıq məsafədə yerləşən bu qədim şəhər, həm də xristian ziyarət turizmi üçün mühüm mərkəz kimi qəbul edilir.

İznikdən sonra ziyarətçilər İstanbulun Ayasofya Muzeyi, Kariye, Zeyrek, Kiçik Ayasofya kimi tarixi xristian məkanlarını da araşdıra bilərlər. Bu səyahət, qədimdən müasirə uzanan xristian irsinin izləri ilə zəngin unudulmaz bir təcrübə vəd edir.

"Cebheinfo.az"