Fransanın Ermənistana ölümcül silahlar təchiz etməsi və uzunmüddətli anti-Azərbaycan mövqeyi sülhə xidmət etməməklə yanaşı, Fransanın xarici işlər naziri Jan-Noel Barro tərəfindən regional gərginliklərlə bağlı ifadə edilən narahatlıqlarla ziddiyyət təşkil edir.

"Cebheinfo.az" xəbər verir ki, bu barədə Azərbaycan Xarici İşlər Nazirliyinin mətbuat katibi Ayxan Hacızadə sosial şəbəkə hesabında paylaşım edib.

"Bu ikili yanaşma Fransanın ikili standartlara əsaslanan mövqeyini üzə çıxarır.

Sülh sazişinin layihəsi üzərində işin yekunlaşması mühüm irəliləyiş olsa da, onun imzalanması və bölgədə davamlı sabitliyin təmin olunması üçün əsas məsələlərin həlli vacibdir.

Bu xüsusda, ilk növbədə, Ermənistanın konstitusiyasında yer alan ərazi iddialarına son qoyulmalı və Fransa da daxil olmaqla xarici aktorların sabitliyi pozan müdaxilələri dayandırılmalıdır.

Bundan əlavə, insanlığa qarşı cinayətlərdə ittiham olunan şəxslərə qarşı məhkəmə proseslərinə əngəl törədilməsi təkcə ölkənin daxili işlərinə müdaxilə deyil, həm də bu cür cinayətlərə görə məsuliyyət prinsipini sarsıdır", - Ayxan Hacızadə bildirib.

"Cebheinfo.az"